السلام عليكم ورحمة الله وبركاته
اخواني الاعزاء
اهلا ومرحبا بكم
ما تطلبونه الان ليس بالشئ الهين ولا السهل
لان السؤال مبهم وغير محدد وواضح
طبعا اختلاف انواع العطل هو اللي بيحدد لك المنطقه اللي هتشتغل فيها
مثلا فيه شاشه بتكون بتقوم هايتنشن وبتحس بالكابل ولكن لا توجد صوره
ودي بتراجع فيها فولت اضاءة الكريستاله واللي هو G2 وتراجع كمان معاه G1
لانه هو ارضي الG2
طيب لو كانوا مظبوطين : تراجع ال6 او 9 فولت بتوع الفتيله تمام
لو موجوده يبقي مرحلة الالوان تشوف فولتاتها لو موجوده هتجرب بكريستاله تاني
لو مش موجوده يبقي العطل متحور كتير وهيدخل معاك في حوارات كتير زي مثلا دارلينجتون الخاص بTIP122
اذا كان موجود في الشاشه
طاب لو الG2 فولته مش موجود هتراجع منبعه ومعني كده ان اللاين ما بيخرجش يعني الشاشه مش بتقوم هايتنشن حتي لو بتحس بالكابل
هنا بقي نراجع فولت الافقي كويس لان هو اللي مسؤل عن دخول الفولت لاطراف الابتدائيه للاين
طيب لو موجود والشاشه مش بتقوم هايتنشن وكمان عندي ترانزيستور الافقي سليم
يبقي الشك يتلخص في 4 احتمالات لا غير
اولها : ترانزيستور الحافز وده تلاقيه موجود بجوار محول صغير قرب مرحلة الافقي
ثانيها : ايسي الاوسيليتور وده هو تاني اكبر ايسي في الشاسيه ويبدا بTDA او STV
ثالثا: ايسي البروسيسور
رابعا : الايبروم ويحمل ارقام مثل 24C02-24C04
طيب لو فولت G2 موجود وفولت G1 مش موجود
لا ده كده هيبقي الاضائة عاليه قوي ودي حكاية تانيه
طيب لو فولت الgG1 عالي زي 250 في حين فولت الG2 قليل زي 120
كده ممكن نحور العمليه بشوية ذكاء صناعي بس عايزه حمكة وخبره شويه
نعمل ايه :::
يا اما نقلل فولت الG1 لانه عالي وبيسحب اغلب فولت G2
وده هنعمله بطريقه سهله وهي اننا نصدم الG1 مع الارضي عن طريق مقاومه قيمتها تتراوح من 50كيلو الي 200كيلو
وكل ما المقاومه تقل في القيمة كل ما الفولت يقل يعني الاضائة تزيد
يا اما :: الطريقه الثانيه
بس دي صعبه شويه ومش اي حد يعملها من اول مره
الطريقه هي زيادة فولت الG2
طيب ازاي ؟؟؟؟
نجيب سلك معزول كويس ويكون يتحمل ونفك طرف الG2 من الشاسيه ونلحمه في اول السلك
ونيجي علي فيرايت اللاين وهو الفحم الممسوك بالحديد اي العامود عاللاين
ونلف شوية لفات وليكن مثلا30-50 لفه
في اتجاه عقارب الساعه
كل ما اللف يزيد قيمة الفولت هتزيد وبالتالي الاضاءة تزيد
وكل ما تلاقي الضاءة عاليه عندك حلين يا اما تنزلها من بوط اللاين يا اما تلغي عدد معين من اللفات
طيب دي حاله كمان
فيه ايه تاني
ممكن يكون المشكله في غياب فولت الالوان او في مرحلة الالوان
هنبدا بتغيير ايسي الميكسر الخاص بالالوان ويبدا بtda
لو ظبط الفولت والصوره ما ظهرتش
يبقي هنغير البري امبليفير الخاص بالالوان
طيب دي حاله كمان
وايه كمان
ممكن يكون فولت الفتيله غايب
لو عايز تراجعه يبقي من خط الفتيله وترجع بيه لورا ها ينزل معاك في شيلد الفلاته ارجع به هتلاقيه جاي من الشوبر بتاع الباور
عن طريق موحد او ترانزيستور ومقاومه ولو مش عايز تلف وتدور
ممكن تفصل اطراف الفتيله وتركب علي خرج ال12 او ال6 فولت
ريجيوليتور 7805 وتلحمه في اطراف الفتيله
او تجيب شوبر خارجي 6فولت وتوصله علي اطراف الفتيله
بعدما تفصل ارضي الفتيله عن ارضي الشاسيه العام طبعا
وممكن كمان زي ما عملت في اللاين تلف 3او 4 لفات حوالين فيرايت اللاين
وتوصلهم بالفتيله ودي طريقه سهله وناجحه جدا وعمليه وآمنه
ممكن لو ما كانش عطلك بالشكل ده يكون ازاي ؟؟؟؟
ممكن الشاشه مش بتحس اصلا بالكابل ولا بالهايتنشن
وفي الحاله دي
عطلك من ضمن الاربعه اللي قلناهم
وممكن حاجه كمان اخيره
ان اللاين يكون تالف
بعد كده حاجه كمان
ممكن الشاشه تكون بتفتح بس الاضاءة ضعيفه هتعالجها زي ماقلنا
ولكن ممكن يتمحور العطل في ان الصوره منكمشه
وده هتلاقيه في اليوك او الديفلكشن ان لم يكن في مكثف السيراميك علي كوليكتور اللاين او في موسفيتات الاتساع
اعتقد كده حصرنا اغلب اعطال عدم خروج الداتا بالرغم من وجود هايتنشن
يبقي لنا شرح سريع علي عدم خروج الداتا ولكن لا يوجد هايتنشن
وده هنخليه لمره تانيه
بالمتاسبه: انا اتكلمت بايجاز واختصار شديد
بمعني اني اعطيت مفاتيح للحلول لو انك فني كويس هتوصل لعطلك علي طول من غير تعب
في حالة تتبعت خريطة الأعطال السابقه
القاكم علي خير :::: اخيكم/اسلام معروف
